ديوان الشاعر نايف العياش الجابري

[تركي العياش]

هذه القصيده قاله الشاعر نايف العياش طالباً من الله عز وجل أن ينزل المطر على البلاد والعباد اللهم أسقنا الغيث

أنا طالبك ياعالم الغيب والغياب=ياعالم دبيب النمل يالله يالوالي

كريمً إليا مديت ومدك بغير حساب=رقيبً على الأمه بخيصً بالأحوالي

تغيث الوطن غيثً مغيثً بغير أرهاب=ثلاث وثلاث وست والوبل همالي

إليا جاء من المنشاء مركز تقل هضاب=ولا به شعيب ألا من الجال للجالي

ودوين مع دورين وكد زمت الأعشاب=ودورين ولينه ربيعً له أضلالي

ربيعً تغني به أطيوره من الأعجاب=ويطرب له الماشي والهم ينزالي

تهيض أزهوره من بعيد الدير جذاب=نبات الوسوم وجاءه ولياً من التالي

لا هبت الحايه تقل فيه نثر أطياب=كبار القشع متعاقب نبته أشكالي

يجاب العلف ويرد من قلة الطلاب=نشب في أيديهم عقب مابيعهم غالي

ونشب المورد والعماميل والكتاب=بعد مالبواخر بين الأقفاء والأقبالي

تدابير من يقبل من التايب إليا تاب=رحومً يغفر الذنب للكرب حلالي

فرجها ليوسف عقب غلق عليه الباب=تولي البلد وأهله ومابه من أموالي

وسامح أخوانه ماتبع فيهم الأسباب=بلاته أمعصوم ولا يجازي بالأفعالي

وجوا بعربهم وسجدوا له وأبوهم طاب=وصار الحسف بأهل العدواه والأقوالي

[تركي العياش]

أبيات مدح قيلت بالشاعر نايف العياش بعضها كتب بالطبعه الأولى وبعضها لم تنشر وسوف تنشر كامله عند الأكتمال من أعداد الطبعه الثانيه بمشئة الله

(1)


نايف وفي نايف يزود أفتخاري=إليا جاء مجال أهل الوفاء والحميه

إليا عدوا اللي ياصلون المحاري=صلبين الأرياء والعزوم القويه

(2)

يانايف العياش رماي الأهداف=صيب الهدف وجيب لي أحتياجي

أبا أنشدك يا شيخ لو كنت عراف=يالشاعر اللي معتلي بالبراجي

(3)

يانايف العياش من نسل الأحرار=من لابةً للطيب دايم مماليك

آلاد الزويكي من بعيدين الأذكار=كيد الحريب أن جات هاذي وهاذيك

عز الرفيق وشر في أوجيه الأشرار=أهل الحماياء في المواقف تنشميك

(4)

يانايف العياش ماتسمع الصوت=ماشفت يوم أومي لكم بالعباتي

ماهمك الأ تلبس البشت والكوت=وأنا عليه صدراً وارداتي

حلفت لو أنك وراء دار بيروت=لاصلك دام الخطى طيباتي

(5)

يامقلط الترحيب مع كل مخلوق=تبدي بها قدام رد السلامي

مع دلةً فنجالها عالي الذوق=من مر يلقاها على مايرامي

(6)

يابو نقاء من غيب الأيام نبكيك=أنته جملنا لازهمنا الجمالي

(7)

صحيح أنك يانايف للقصيد الجزل سلطاني=وأنا بشكرك يانايف يابن عياش يالحربي

(8)

سوقه لنايف وله ربعً لهم غيره=وسلم على ربعنا ذرفين الأيماني

ذباح للحيل وماحسب مخاسيره=وشاعر وله بالشرف قولً وبرهاني

(9)

أبو نقاء دايم على الطيب نايف=ومرطب السانه على الذكر تلطيف

(10)

يابو نقاء مانته بغلطان ترثاه=الله يبيحه ويمهل بعمر راثيه

صدقت في قولك وقافك ومعناه=الطيب يبقى حي لو مات راعيه

(11)

نايف اللي له أصحاب المعاني عسايف=حيث ماقادها العياش تنقاد أديبه

والشرف والمروه له في بيض الصحائف=نفتخر فيه وأن جاء ماقفً نعتزي به

(12)

يامرحبا واهلين باهل المبادي=حييت بانايف إليا رحت وأن جيت

يامرحبا واهلين باهل الشدادي=عدد حجيج البيت لا جاء ولبيت

(13)

يلفي على راعي العلوم الجليله=راعي دلالً في مشبه سطرها

(14)

أنتم بني عمر والجوابر مسمين=إليا شان مابين العميل وعميله

أهل السلوم وتعرفون القوانين=وأقدامكم يوم المعارك ثقيله

[تركي العياش]

قصيده رثاء من الشاعر نايف العياش في وفاة المرحوم الأمير نايف بن ناهس الذويبي الحربي رحمه الله

يامل قلبً صايرٍ به هواجيس=وبداخله منها كما النار باليف

ناراً من الغربي عليها نسانيس=شبت وقبت قحمتها العواصيف

على الأمير اللي يفك المحابيس=وأن صار بالمجلس يعداله الكيف

أمارتة ماهي بحبر وقراطيس=ولاهي اعلوم بحيد مركاء وسواليف

أمير حرب ومعترف صاحب القيس=فالخيل والبيرق وبشلفاه والسيف

يوم القدايم فوق مثل المقاويس=يومً مغاوير ويومً مناكيف

كم شيخ يقصر عن هقاويه ويكيس=عقب أيتهقوا يترك أرياه ويعيف

زبون من جاته لهود وحواسيس=والله عليه من الليالي مواحيف

نجره جذب له ساريً بالغطاليس=وصينيتة يشبع بها الجار والضيف

ماقال ذا غالي ولا قال ذا رخيس=ولا قال غليانه علينا المصاريف

طيب وطيبه عقب ناهس بتأسيس=له ماقفً يرجح بكل المواقيف

وقصيره الشاعر يبشر به أعديس=لاقفاء الزبون اللي بسومه تحاسيف

عنده على وصفين قرح وساديس=ويجيبها اللي ماحسب للتكاليف

لا جو صلاف والركايب مراويس=ومن الزهاب اللي عليهن مضاريف

وشنونهن قفوا الأشده ميابيس=فقبالة الكنه وبقفاية الصيف

يالله ترحم كاسبين النواميس=أهل الكرم وأهل الشرف والمعاريف

ضمتهم الألحاد بعد المجاليس=دنيا طربها مرقبله صواديف

من كل دربً لها أسبور وعساعيس=من فهيم القلب زملان ومخيف

[تركي العياش]

هذه القصيده قالها الشاعر نايف العياش في أحد المناسبات التي جمعة القبيله موضحاً من خلال القصيده قدرة الله

عز وجل على عبادة وطالباً من المولى لم الشمل بين جماعته مكرهم بأفعال الأباء والأجداد

سلام الله عليكم ردةً حاضر بها الرحمن=على مايرضي المولي مشت والنور غاشيها

على المقدار مبداها ومعناها على البرهان=مفيده يستفيد اللي حضرها ومن سمع فيها

وزنها من وزنها بين قلب وبين نطق اللسان=ألا ياقرب بينها والا يا بعد خافيها

الا يالله ياراعي الفرج يامنشي الأمزان=يامسقي الأرض عقب أمحالها منبت ذواريها

وبأمرك يجبر الكسر العطيب وينجي المرضان=وبامرك ناس ترفعها وبه ناس ترديها

تلم الشمل وانت اللي يلمه ياعظيم الشأن=عسى الأمواه ترجع لين تمشي مع مجاريها

عسى الأمواه ترجع لين تشرب شجرة الرمان=وسيعً ظلها من ساسها ماحداً هقاء فيها

مقيلاً للصديق ولا توجه يمها العدوان=وكم واحداً يجظ أشواه يوم يحل طاريها

ويثيت جابتي يوم أنها تعرف بدون أعلان=على كثر الشجر كلن يبي جنبه تواليها

سبب هاك العلوم اللي بعدها كل قاسي لان=تعيف واختلف رأيه وهقواته مخليها

من اللي جات شرق من العطن جات وخبرها بان=ويم العوشزي جاء مثلها وحنا بحراويها

على ممشاء أرجالن قدمنا الأبوان والجدان=رجالً تكسب الطاله وتتعب من يعاديها

[تركي العياش]

من جديد قصائد والدي هذه القصيده قالها في الشاعر سمير بن غلاب العريمه قبل عدة أيام ولها مناسبه

عطوني الجوال ابسجل أبيات=أبيات جزله قلتها بابن غلاب

اللي ايبايب للوازم إليا جات=والثانيه ينصاء ويفقد إليا غاب

سنه ماجاني والسنه عن سنوات=أبطاء ولا ني دارين ًويش الأسباب

والبقيه سوف تكتب في ديوان الشاعر بالطبعه الثانيه

[تركي العياش]

قصيده غزليه لشاعر نايف العياش

أنا كيف أعاونكم وبقبل شراب شعيل=وأنا كل مالديت ماشوف غندوره

من الصبح لين الظل حير قبال الليل=وأنا واقفً والعين بالنظر مجبوره

اتطالع لمخلوقً مع الورد مثل سهيل=أبو قذلةً شقرا على المتن منثوره

رد عليه الشاعر رفاعي المطيري

إليا صرت يالعياش عايف شراب شعيل=مالومك تبي لك شربةً مالها جوره

تبي من قليبٍ شرب ماءها سوات السيل=عليها النخل والزرع شغال ماطوره

وكم واحداً قدمك عليها طواه الويل=وأنا كيف ألومك شايفً زينة الصوره

(شعيل) بئر يقع في البعائث التابعه لمنطقة حائل

[تركي العياش]

هذه القصيده قالها الشاعر نايف العياش ولها مناسبه وهي مروبعه

عديت بالمرقاب وابديت ماطاب=لاعاب من يم جدي ومن يم خالي

شجره ظليله من فروع القبيله=وقافي دليله عن طويل الجدالي

يوم ابن عمي وجه القاف يمي=ماهي أرضاته وخصمته بالعجالي

ابدي بقافً زين سالم من الشين=يمشي على سيدين مما طرالي

قافً بدعته من ظميري وذعته=بعد شفته متجه للعدالي

أنا لا جبت القيل مايصير به ميل=افصله تفصيل قيس أفتصالي

الأوله شعار والعب واختار=والثانيه بيطار في كل حالي

كلاخ للأضراس واكوي الراس=وعندي نظر وقياس وأقرأ وسالي

من كاسبين العرف ينفعني الحرف=ولو مافيه صرف وقف الريالي

من غشيم ابقي على غير تعليم=ولا هنا فهيم الا جليس الرجالي

من جالسوه لسوق الارباح ردوه=سوقً اليا طبوا به كل غالي

سوق الإناره والشرف والوقاره=وفيه التجاره والزهى والجمالي

من جالس الأنذال ماطاب له فال=عمال مايكسب غير الهبالي

حيً ولا كنه حي وما ينفع بشي=لا هذي ولاذي رادي منالي

هذا وماعبرت بالفكر واحضرت=واخذت من بني البيوت الجزالي

بنطق الساني في حسين المعاني=وتفوز صدقاني لاجاء مجالي

[تركي العياش]

من اقوال الشاعر نايف العياش

ياراكب اللي تو وارد مضله=ماحن بالواحد بحملاً ثقيلي


ماواقفوه أن باينة فيه خله=والا عيار الزيت صاير قليلي


ينصى صحيباً جابتي ماتزله=يرتاح والراحه زمام الدليلي


لو أن من شافت عيونه حصله=كلاً على مخيور عينه يميلي


ونيت ونة من بدت فيه عله=والا مقدم بالإشاعه عليلي

[تركي العياش]

من اقوال الشاعر نايف العياش

عزالله ان العبد ينهى ويؤمر=واللي قسم له لازم أنه لياتي

لوا ربيعي عقب عشبه تكبر=رحت وفسخته مثل فسخ العباتي

مشيت فيه إليا الحيود المزبر=وهذاك عهدي بالمطر والنباتي

وحيسفي يالسيل والعشب الأخضر=اللي زما في رغبتي وشهواتي

عليه مزن الصيف قام ايتهصر=دورين مع دورين متابعاتي

وهني غض الروح فيه ايتقفر=ماشايلنه مثلي الشايلاتي

متريح وملتم شمله ومستر=ودار دوره في طرات الحياتي

مالوم قلبي يوم قام ايتذكر=ولا لوم عيني يوم عيت تباتي